“Suzuki Motor Corporation”ın Direktorlar Şurasının sədri Osamu Sudzuki iyun ayında səhmdarların toplantısından sonra 91 yaşında vəzifəsindən ayrılacaq.
Bu barədə Yaponiyanın “Kyodo” agentliyi şirkətin press-relizinə istinadən məlumat verib.
Yaponiyalı biznesmen şirkətdə baş məsləhətçi olaraq fəaliyyətini davam etdirəcək.
Şirkətə isə həmin tarixdən etibarən 2015-ci ildə qrupun prezidenti vəzifəsini icra etmiş Osamu Sudzukinin oğlu Tosihiro rəhbərlik edəcək.
Osamu Sudzuki “Suzuki Motor Corporation”a 1958-ci ildə qoşulub, kiçik rəhbər vəzifələr də daxil olmaqla, müxtəlif səviyyələrdə çalışıb. “Suzuki Motor Corporation”ın qurucusu Miçio Sudzukinin nəvəsi Şoko Sudzuki ilə evləndikdən sonra arvadının soyadını götürüb. Bunun səbəbi Sudzuki ailəsinin kişi varisinin olmaması idi. Bundan əvvəl onun soyadı Matsuda idi.
O, 1963-cü ildə direktor postuna yüksəlib. Dörd il sonra kiçik idarəedici direktor, 1972-ci ildə isə böyük idarəedici direktor olub. 1978-ci ildə şirkətin prezidenti və baş icraçı direktoru (CEO) vəzifəsinə yüksəlib.
2000-ci ildə CEO vəzifəsindən ayrılıb və “Suzuki Motor Corporation”ın direktorlar şurasının sədri olub.
Osamu Sudzukinin rəhbərlik etdiyi 43 ildə “Suzuki” avtomobil istehsalçıları arasında qlobal oyunçuya çevrilib.
Daha əvvəl Osamu Sudzuki şirkətin 2020-ci ildə keçirilmiş 100 illik yubileyinin onun rəhbərlikdən ayrılmaq qərarına gəlməsinə təsir etdiyini açıqlayıb.
“Orta müddətli iş planını irəlilətmək üçün yerimi xələfimə vermək qərarına gəldim”, - o demişdi.
Plana görə, şirkət 2025-ci maliyyə ilində 4,8 trilyon yen (46 milyard ABŞ dolları) həcmində (2019-cu maliyyə ilində bu rəqəm 3,49 trilyon yen olub – red.) satış həyata keçirmək, 2025-ci ildən etibarən isə avtomobillərin elektrikləşdirilməsini əhəmiyyətli dərəcədə genişləndirmək niyyətindədir.
Reprot

 25.02.2021